“Vo ëis udù la scola ladina crëscer“: festa de cumià per i nsenianc

Cun na blota festa de cumià à 12 nsenianc y nseniantes stlù ju ai 31 de agost 2020 si cariera prufescionela tla scolines y scoles ladines.

Tla scola mesana de Sëlva i à l assessëur per la scola ladina y la ntendënta Edith Ploner rengrazià per duc i ani de lëur y si pascion de maestri: Else Demetz, Ursula Hoenmanns, Lois Kastlunger, Helga Kostner, Gertrud Irsara, Rosmarie Mussner, Erica Pedevilla, Karin Pedevilla, Gabriella Prinoth, Maria Cristina Senoner, Eveline Vinatzer y Gabriella Vittur.

“Ëis purtà pro a fé deventé la scola chëla che la ie śën”

L assessëur Daniel Alfreider à sotrissà l valor dla gran esperienza a chël che na vita de nseniamënt porta y l à nvià i nsenianc a ne se desmincë nia de dé inant dut chësc, nce me cun na parola de sustëni o n pitl cunsëi. La ntendënta Edith Ploner à auzà ora l gran mpëni de uni nseniant y uni nsenianta che à fat pea te chisc ultimi 40 ani n grumon de mudamënc a livel soziel, culturel, didatich y educatif. “N possa dì – à dit la Ntendënta – che Vo ëis udù la scola ladina crëscer y ëis purtà pro a la fé deventé chëla che la ie śën: na scolina y na scola de cualità”.

I diretëures dla scoles à ponà auzà ora cun de bela laudatio la storia prufescionela de uni un y una, ma nia mé chësta. Lauré te scola uel dì dantaldut avëi y curé relazions cun la persones, la coleghes y i colegs, la mutans y i mutons, la sculées y i sculeies, i genitores – stories de vita che pudëssa deventé libri, coche à nce dit la Ntendënta Ploner. La festa de cumià ie unida abelida dala bela ujes de “I Rujins” y meneda tres la bela moderazion dla diretëura Claudia Schrott.

Scrite ite tl canal Telegram!  👉🏻  https://t.me/altoadigeinnovazione

Sun ince sön Facebook 👉🏻  https://www.facebook.com/altoadigeinnovazione

Y Linkedin 👉🏻  https://www.linkedin.com/company/alto-adige-innovazione