Alta Badia y Plan de Corones: cater lifc nűs por la sajun 2020/21

Sun tl plëgn tla sajun da d’isté y ince tl plëgn di laurs por la sajun che gnarà, chëla da d’invern. Tl Alta Badia vëgnel lauré dassën por renové dui implanc portamunt, le “Costoratta” (che passa da 4 a 8 posć) y “La Brancia” (da 4 a 6 posć). Sön Plan de Corones, indere, esun tl realisé n proiet architetonich y tecnologich che fej impresciun: le Olang I y II.

Costoratta: 3.400 porsones al’ora

Insciö ciara fora i scagns a 8 posć dl implant nű “Costoratta”. (ph: Movimënt)

Söinsom a Ciaulunch, sura Corvara, vëgnel fat sö danű le “Costoratta”, implant anuzé dantadöt dai schiadus che vëgn da Reba fora por fa la roda dl Sela tla direziun antiorara. Ala se trata de n lift a scagns nű che passa da cater a ot posć, cun na cupola y na stangia de segurëza por i mituns. Y che rűva ai 2.054 metri dla staziun a munt te 2,21 menűc. Te atres parores: söla trassa de 706 metri fejel 5 metri al secund y porta söinsom feter 3.400 porsones al’ora. Cina ciamó ê la portada dl implant dla dita Poma de 2.080 porsones al’ora. Le lift, che va zoruch al 1999, vëgn fat sö dala dita Leitner por cunt dl Skicarosello Corvara y gnarà completé por otober. Laprò gnaral ince fat mioramënc ala pista deperpo che le lift vedl – dij le responabl dl cantier Raimund Irsara – gnarà venű inant, a na localité invernala dl’Europa dl Ost.

La Brancia: nia plö da fa coda

N atra novité por l’invern tl raiun da ji cun i schi dl Alta Badia è “La Brancia” a San Ciascian – olache al se forma dagnëra de gran codes de schiadus y che é gnű fat sö dan 24 agn. Te manco de 2 menűc portarà le lift a scagns nű da sis posć zirca 2.800 porsones al’ora söinsom ala staziun a munt a 2.042 metri. Por fá n confrunt: cina ciamó ê la portada de 1.875 porsones. Ince chilò é la dita de costruzion la Leitner Ropeways da Sterzing. Y ince te chësc cajo vëgn l’implant realisé sön la medema trassa.

Olang I + II: i laurs va inant alasvelta

Le implant sarà arjigné por la sajun 2020/21, arà la staziun a val a Valdaora tla localité Gassl, a 1.164 metri, na staziun intermediara a 2.089 metri y chëla söinsom a 2.275 metri. (ph: schlotthauer matthiessen architecturemade) 

Cun gran coriosité vëgnel spo ciaré sön Plan de Corones. Ai va inant debota i laurs por l’implant a cabines “Olang I + II”, da Valdaora sö cina sön Plan de Corones. Le coronavirus n’à nia archité le cantier. Le lift dl 1989 gnará fat danü y dl proiet se crűzia le stüde de architetöra todësch “schlotthauer matthiessen architecturemade”, cun l’inj. Cornelius Schlotthauer (che é bele ste “senior associate” pro Zaha Hadid Architects). L’implant gnará costruì dala dita Doppelmayr y deventarà “le plö modern y tecnologich” dl raiun. Les cabines nöies da 10 posć (denant sis posć) portarà sö cina 3.900 porsones al’ora, a na velozité de 6,5 metri al secund (la portada ê denant de 2.160 schiadus al’ora). Dër particolares sarà les staziuns a munt, a val y intermediara cun curidöres trasparëntes che recorda ones de cristal y cun na cupola che pormetará da odëi les perts mecaniches en aziun. Les 180 cabines jarà a na velozité de 6,5 metri al secund, sön en dislivel de 1.100 metri y te manco de 12 menüc. I laurs mussess ruvé ia por l’altonn.

Iscriviti al canale Telegram! 👉🏻 https://t.me/altoadigeinnovazione