Passa 3000 fotografies de Hans Pescoller tl Museum Ladin

Le archif dl Museum Ladin a San Martin de Tor é gnü ingrandí: al ti é gnü surandé la gran coleziun de Hans Pescoller, le fotograf conesciü sciöche autur de plü libri fotografics mo ince por la gran cerna de leteratöra da munt, mort tl 2017. 

Al fô n dejider de Hans Pescoller da San Martin, conesciü suradöt sciöche gran amant dla munt y autur de plü libri de fotografies, da surandé dô süa mort la coleziun al Museum Ladin. Y insciö éla stada dan en valgügn dis. La surandada dl archif fotografich é gnüda a se le dé en presënza de Arno Kompatscher, dl team dl Museum Ladin y so comité scientifich y dla vëdua de Hans Pescoller, Anna Verginer y süa familia. Aladô de Kompatscher á i museums por definiziun le compit da cöi adöm ogec y dai conservé y dai mostré y trasmët al publich.

La picera zerimonia tl Museum Ladin por festejé le archif fotografich nü y la mostra nöia “Depot. Y al é gnü la löm!”

“Les mostres é gonot la contlujiun dl laur ti museums. Le laur doia, dala coleziun ala documentaziun y conservaziun é la fondamënta de vigni museum. Da plü de 20 agn él le Museum Ladin che documentëia i bëgns materiai y imateriai dla identité dles valades ladines y de süa popolaziun” á dit Kompatscher. Cun l’ampliamënt dl depot ti vëgnel sëgn garantí a chësta documentaziun unica n post de conservaziun adaté, n archif che cunta na pert dla realté ladina di ultims agn.

Ativité de coleziun da 20 agn

Hans Pescoller ê secreter de comun y n fotograf apascioné che á fat jö por dezens alalungia contrades, porsones, plantes y tiers tles valades ladines y ince foradecá. Al á ince publiché de plü libri de fotografies. Süa opera é metüda adöm da passa 33.000 fotografies che fajará da sëgn inant pert dla coleziun dl Museum Ladin.

Le “merlo acquaiolo” fotografé tla Val Badia da Hans Pescoller.

“Da plü de 20 agn abinunse adöm ogec che trasmët la cultura dla jënt ladina”, spliga Stefan Planker, diretur dl Museum Ladin, inaudé dl 2001. Da dailó inant s’á so patrimone tresfora amplié “tres acuisiziuns, mo sovënz ince tres donaziuns da pert de privac. Chësc nes desmostra che i gnun dër aprijá y chël nes fej sambëgn na gran ligrëza”.

Les operes de Pescoller

“Cun les fotografies de Hans Pescoller vëgnel curí dal punt de odüda fotografich döta la Ladinia dala fin dl XVIII secul cina aldedaincö” dij Planker. Danter i (tröc) libri de fotografies che Pescoller á dé fora, recordunse: ”Val Badia – Retrac y impresciuns” (1995); ”Dolomites – pizes magiches” (2002); ”Tera Ladina – Dolomites” (2008); ”Scincundes” (2009);  ”Bergkristalle – löms sön tru” (2013). “Por ël fô la fotografia n hobby che adorâ tröpa paziënza; ël aspetâ datrai ince plö de n ora cina che na niora se spostass o che al foss la dërta löm” á cunté Anna Pescoller.

Le museum lascia odëi l depot

Y por ci che reverda les coleziuns: tl Museum Ladin él ince gnü presenté la mostra d’ert “Depot. Y al é gnü la löm!” olache al vëgn mostré operes fora dl patrimone dl museum. Ara se trata de depënc, dessëgns y scoltöres, realisades da 19 artistes y artisć dles valades ladines che á vit y operé danter le 17ejim secul y l’ann passé.

Le museum é ciamó davert cina ala fin d’otober.

La mostra tl Museum Ladin deura y lascia odëi ci che resta normalmënter ascognü tl depot dl museum, ara porta propi na löm nöia sön i artisć y les artistes y sües biografies. Les operes é metüdes fora te dui locai: le pröm se conzentrëia sön la figöra umana y süa corporalité y injopa les vijitadësses y i vijitadus, al i tol ite. Le secundo local é dediché ala natöra y al’architetöra. Sön i parëis vëgn les operes metüdes fora sciöche finestres ideales, che porta imajes dla natöra tla galeria de chedri.

Davert cina ala fin de otober

An pó jí a ti ciaré ala mostra cina d’agost dl 2021. Le museum é ciamó davert cina ala fin d’otober dal mertesc ala sabeda, dales 10 ales 16 y la domënia, dales 14 ales 18. La sajun nöia scomëncia do Nadé. I artisć: Jacob Zanusi (1679-1742), Dominik Vinatzer (1666-1733), Domëne Moling (1691-1761), Dominik Mahlknecht (1793-1876), Franz Tavella (1844-1931), Josef Moroder Lusenberg (1846-1939), August Pezzei il Vecchio (1847-1915), Franz Angel Rottonara (1848-1938), Antonio Colli (1870-1950), Franz Josef Noflaner (1904-1989), Mili Schmalzl (1912-2006), Peter Demetz (1913-1977), Angel Morlang (1918-2005), Lois Irsara (1923-2014), David Moroder (1931-1997), Josef Kostner (1933-2017), Otto Irsara (1933-2004), Bruno Vallazza (1935-2016), Aldo Canins (1944-2019) y Martin Demetz (1930-2007).

Chiló la mansciun internet: museumladin.it

Scrite ite tl canal Telegram!  👉🏻  https://t.me/altoadigeinnovazione

Sun ince sön Facebook 👉🏻  https://www.facebook.com/altoadigeinnovazione

Y Linkedin 👉🏻  https://www.linkedin.com/company/alto-adige-innovazione