Istitut Cultural Ladin Micurá de Rü: Elmar Castlunger é le presidënt nü

Tla prüma sentada dl Cunsëi d’aministrazion dl Istitut Ladin Micurá de Rü, é Elmar Castlunger da La Ila gnü lité presidënt, Monika Senoner vizepresidënta.

L Cunsëi d’aministrazion dl Istitut Ladin Micurá de Rü – metù adum da Elmar Castlunger, Monika Senoner y Giorgio Costabiei – ie unit istituì da nuef cun deliberazion dla Jonta provinziela n. 273 di 23 de merz 2021. N vënderdi ai 26 de merz tla prima senteda dl cunsëi iel unit lità si presidënt y vizepresidënta. L Istitut Ladin Micurá de Rü cun sënta a San Martin de Tor à l duvier de studië a livel scientifich l lingaz, la storia y la cultura di ladins dla Dolomites. “L Istitut ie una dla seves plu mpurtantes per mantenì y svilupé la rujeneda y cultura de nosta mendranza. L dà mpulsc mpurtanc per si svilup y porta danter i zitadins y la zitadines  cunescënzes y nrescides nueves sun nosta cultura”, sotrissea l assessëur Daniel Alfreider.

Dialogh cun d’autra mendranzes 

L Istitut culturel ie oradechël na luegia de dialogh cun d’autra mendranzes linguistiches. “De mpurtanza ie la culaborazion cun d’autra istituzions cultureles y lueges de furmazion, dantaldut canche la va de scumenciadives plu amples”, dij l assessëur. Sun proposta dl assessëur à la Jonta provinziela ai 23 de merz 2021 numinà l cunsëi nuef dl Istitut Micurà de Rü. L cunsëi d’aministrazion se cruzia dla gestion ordinera y straordinera dl Istitut. Danter si funzions plu mpurtantes ie apurvé l program de atività anuel, apurvé l budget economich y d’investimënt, la corezions y mudazions eventueles dl budget, sciche nce l bilanz consuntif, nominé la Comiscion culturela y sun si pruposta l presidënt / la presidënta y n si sostitut /na si sostituta.

Presidënt y vizepresidënta

Tl cunsëi nuef ie Elmar Castlunger l reprejentant dla Jonta provinziela, Monika Senoner la reprejentanta dl sistem scolastich y Giorgio Costabiei l reprejentant di chemuns. Tla prima senteda de n vënderdi ie Elmar Castlunger unì lità presidënt y Monika Senoner vizepresidënta. L Cunsëi d’aministrazion resta nforza per i proscimi trëi ani.  Chisc agn ê le Consëi d’Istitut metü adöm da Erika Castlunger (presidënta), Roland Demetz (ombolt) y Heinrich Videsott (rapresentant de scora y cultura ladina). Dla comisciun culturala fej pert: Katharina Moling (presidënta); Roland Verra; Sabrina Rasom; Moreno Kerer.

Les finalités dl Istitut Ladin 

Studié a livel scientifich lingaz, storia y cultura di Ladins dles Dolomites, lauran adöm cun universités y istituc spezialisá nazionai y da foradecá y cun d’atres uniuns culturales che á i medemi fins. Le mioramënt dl ladin scrit y baié dess, sce ara vá, gní metü a jí en colaboraziun cun les scores di paisc ladins y cun le Departimënt Educaziun y cultura ladina – Ciamp Inovaziun y Consulënza; mantigní, defëne y fá crësce la cultura, les usanzes y les tradiziuns, l’ert, le cianté di Ladins y dé forza al mantignimënt dl lingaz scrit y baié tres i mesi de informaziun, les publicaziuns, les manifestaziuns culturales, i cursc d’ajornamënt programá por alzé le livel cultural en general; mëte sö n archif cun documënc, fotos y registraziuns sön vëta; pité na biblioteca spezialisada por stüdi ladins; fá crësce les relaziuns danter i Ladins dles Dolomites, di Grijuns y dl Friul.

Tla foto: la sentada por la lita dl Consëi d’aministraziun nü. Da man ciampa söinsom: Giorgio Costabiei, Elmar Castlunger, Leander Moroder, (fila dessot d.m.c.): Heidi Dapunt, Mathias Stuflesser, Monika Senoner y Daniel Alfreider.