Covidino y Lara, le liber che spliga le virus ai mituns

“Lara incunta Covidino, na picia creatöra dal ciaré fora n pü’ particolar, da corú, mai odüda denant. Deboriada ciafi fora cich’al sozed sce Covidino röia en contat cun Lara. I dui impara da vire adöm cun serenité”. Y avisa chësc é l’aspet fondamental che les pedagoghes de Casa Bimbo Tagesmutter ó ti comuniché ai mituns: na conviënza da sté saurí, ince te momënc plü ris. 

Le liber te trëi lingac (talian, tudësch y ladin – gherdëna y badiot) á le titul “Covidino e Lara” y ó porvé da ti cunté y ti splighé le coronavirus ai plü pici. Adöm ciafarai fora cich’al al pó suzede sce Covidino incunta na porsona; che se lavé gonot les mans é dër important; che strinidlé o tossì tl comedun pó ince daidè a fermé l’infeziun. Le liber –  dij i auturs y i promoturs – ó ince insigné le pëis al atenziun dles bones manires de convivënza por n comportamënt sozial dagnëra tl respet dl proscim, y les regoles dl igiena che podun y mossun mantignì ince tl dagnì.

La publicaziun é dada fora dal Istitut Ladin Micurá de Rü en colaboraziun cun la Cooperativa Casa Bimbo-Tagesmutter.

“Al é n liber dër ütl por splighé te na manira ligherzina, scëmpla y morjela la situaziun de convivënza cun le coronavirus ai mëndri” dij Miriam Leopizzi, aministradëssa de Casa Bimbo-Tagesmutter. La publicaziun nöia, presentada dan en valgünes edemes y dada fora dal Istitut Ladin Micurá de Rü propi en colaboraziun cun la Cooperativa Casa Bimbo-Tagesmutter, é dessigné da Elisa Obwegs da San Ciascian y é gnűda partida fora a dűc i pici dla cooperativa, feter 400.

N tema zite

Le liber ò porvé da ti cunté y ti splighé le coronavirus ai plü pici.

Le virus á n aspet nia manacius. Impó ol dé impulsc pratics por afronté l’emergënza. “Al fo important por me che le virus ne ciarass nia fora sciöche n compagn dla picera Lara” dij Elisa Obwegs. Che sotrissëia: “Vigni ota che les döes figöres aparësc adöm, él dagnëra na certa destanza amesa ite”. I tesć é gnüs metüs adöm da na scuadra de pedagoghes y pedagogs de Casa Bimbo-Tagesmutter. Le liber pon ince cumpré (al prisc de 5 euro) tles ciases di pici y sön le portal dl Istitut Ladin Micurá de Rü.

Mascherot al perele

Splighé ai mëindri co vire cun le virus, i comportamënc da to por s’l nia taché y le mascherot da se vistì te certes situaziuns n’è nia scëmpl, dij ince i esperc dl Ordin di doturs dla Talia (Fnomceo). Che dan da püch á orű respogne a na domanda che tröc geniturs se fej: co fa da ti tó la tëma ai mituns por ci che reverda la proteziun che cűr la műsa y pó aparì manaciosa? “Le pröm cunsëi – ince secundo l’American Academy of Pediatrics – é chël da se ciaré te spidl adöm a osc műt, trami cun le mascherot indos. Le secundo tira ite i pereli te ciasa: vistide la maschera ince ai tiers de peluche preferis da osc műt”. “Y sce chësc ne bastass nia ciamó – spliga inant i doturs di mituns – porvede da depënje les mascheres de stof a na moda che chëstes sides personalisades y da rí”.

Scrite ite tl canal Telegram!  👉🏻  https://t.me/altoadigeinnovazione

Sun ince sön Facebook 👉🏻  https://www.facebook.com/altoadigeinnovazione

Y Linkedin 👉🏻  https://www.linkedin.com/company/alto-adige-innovazione